1 година постоење на Phones.mk! 🎉
Кои се најпопуларните брендови, модели и продавници на мобилни уреди во Македонија?
Во декември Phones.mk го прослави својот прв роденден! 🥳 Проектот кој го започна своето постоење во 2020-та како дипломска работа на еден студент на ФИНКИ, денес е прераснат во главното место за споредба на цените на паметните уреди и за наоѓање на најдобрите понуди во македонските продавници.
Низ последната година, Phones.mk забележа постојан раст на посетители и корисници на сајтот, и денес може да се пофали со над 5000 месечни активни корисници! 📈
По тој повод, во овој блог пост ќе разгледаме неколку интересни статистики извлечени од корисниците на сајтот, со цел да добиеме идеја кои брендови, модели и продавници на мобилни уреди беа најпопуларни на македонскиот пазар минатава година.
Најпопуларни брендови
Во светот на мобилните телефони, два брендови убедливо го доминираат македонскиот пазар според својата популарност, а тоа се: Samsung (31.6%) и Xiaomi (27.6%).
Комбинирано, овие 2 брендови се заслужни за безмалку 60% од сите прегледи на Phones.mk. Ова и не е некакво изненадување со оглед на тоа што Android телефоните се најпопуларни на нашиот пазар, а овие 2 брендови се светски лидери во таа категорија.
На трето и четврто место стабилно се зацементирани Apple (12.8%) и Huawei (8.4%) соодветно, додека за петтата позиција се борат брендовите Oneplus (2.7%) и Motorola (2.5%) со минимална разлика помеѓу нив.
Во категоријата на таблети, Samsung (23.7%) повторно ја има честа да биде прогласен како најпопуларен бренд, проследен од брендовите Apple (17.5%), Lenovo (14.2%) и Huawei (10.4%). На петтата и шестата позиција, со големо заостанување следат брендовите Amazon (3.9%) и Microsoft (3.4%).
Кај паметните часовници, со голема предност пред другите, на првата позиција се наоѓа Xiaomi (26.2%). После нив доаѓаат Samsung (13.1%), Huawei (11.6%), Apple (9.8%), North Edge (9.4%) и Garmin (6.6%).
Xiaomi нудат евтини часовници и алки со голем број опции и висок квалитет, па затоа и не е изненадување дека уживаат толкава предност пред конкуренцијата.
Најпопуларни модели
Изминатата година, далеку најпопуларен модел на мобилен телефон според бројот на прегледи беше Samsung Galaxy A12. Тој е дел од ниско-буџетната понуда на Samsung, и претставува одлична вредност за ниска цена. На второто место се најде Xiaomi Redmi Note 10 Pro кој е одлична средно-буџетна опција. Додека на третото место заврши Apple iPhone 12 кој ја претставува високо-буџетната категорија.
На листата на најпопуларните 10 покрај телефоните на Samsung се најдоа и неколку модели на Xiaomi, и 2 модели на Apple.
Кај таблетите пак, најпопуларни се покажаа моделите Samsung Galaxy Tab A7 и Apple iPad 8. Кои ги претставуваат средно-буџетните понуди на двата брендови.
Додека пак кај паметните часовници имаме потесна трка помеѓу модели од Apple, Xiaomi и Samsung, каде како најпопуларен модел се покажа Apple Watch Series 7. Паметните часовници од Apple веќе долго време се лидери во оваа категорија, па затоа ова и не е некое изненадување.
Најпопуларни продавници
Можеби најинтересна категорија за анализа е популарноста на продавниците индексирани на Phones.mk. Според бројот на кликови од Phones.mk, за првото место се борат продавниците Anhoch (14.3%) и Ledikom (14.0%). Веднаш зад нив ги следат Mobelix (12.8%), Setec (11.2%) и Neptun (10.4%). Додека останатите продавници заостануваат значително од оваа водечка петорка.
Што е следно за Phones.mk?
За крај, сакам да искажам благодарност за довербата и поддршката на сите корисници на Phones.mk. Континуираниот раст на посетите покажува дека сме на прав пат, но секако нема да застанеме тука.
Иако е прерано да се шпекулира како Phones.mk ќе се развива во 2022-та, во план се повеќе подобрувања и надградби на сајтот. Доколку сакате да сте во тек со сите новости, заследете нѐ на нашата Фејсбук страница.
Благодарам,
Давид Симеоновски